İçindəki
Xəbərlər
“Hərbi Münaqişələrin Ətraf Mühitə Təsiri” mövzusunda beynəlxalq konfransın plenar iclası tematik məruzələrlə davam edib
“Grand Hotel Europe”da keçirilən “Hərbi Münaqişələrin Ətraf Mühitə Təsiri” mövzusunda beynəlxalq konfransın plenar iclası tematik məruzələrlə davam edib.
Sessiyalarda müharibədən qalmış minaların, qanunsuz mədən fəaliyyətinin və ekoloji şüurun gələcək inkişafının müxtəlif aspektləri elmi müstəvidə araşdırılıb.
Rusiya Prezident Akademiyasının professoru, fəlsəfə elmləri doktoru Nizami Məmmədov “Hərbi və ekoloji fəaliyyətin birgə mövcudluğu müasirliyin paradoksal atributudur” mövzusunda çıxış edərək, müasir dövrdə hərbi strategiyaların ekoloji mülahizələrlə necə çarpazlaşdığını fəlsəfi və metodoloji aspektlərdən təhlil edib. Məruzədə ekoloji sivilizasiya anlayışının formalaşması, müharibə və ekoloji məsuliyyətin birgə dəyərləndirilməsi kimi aktual məsələlərə toxunulub
Azərbaycan Respublikasının Minatəmizləmə Agentliyinin (ANAMA) nümayəndəsi Elnur Qasımov “Müharibədən qalmış minaların və partlayıcı qalıqların Azərbaycan Respublikasının ətraf mühitinə mənfi təsiri” mövzusunda çıxış edərək, işğaldan azad edilmiş ərazilərdə mina və partlayıcı qalıqların torpaq, su və canlı aləmə yaratdığı təhlükələri faktlarla əsaslandırıb.
Ardınca Famil Hümbətov (Radiasiya Problemləri İnstitutu) “Şərqi Zəngəzur rayonunda işğal dövründə qanunsuz mədən fəaliyyətinin ətraf mühitə təsiri” mövzusunda təqdimatla çıxış edib. Məruzədə işğal zamanı aparılan nəzarətsiz mədən istismarı nəticəsində yaranmış ekoloji pozuntular, torpaq strukturu və su ehtiyatlarına vurulan zərərlər elmi təhlillərlə təqdim olunub.
Qeyd edək ki, plenar iclasda sual-cavab sessiyası təşkil olunub. İştirakçılar təqdim olunan məruzələr ətrafında fikir mübadiləsi apararaq, elmi və praktiki yanaşmaların inteqrasiyası ilə bağlı təkliflər səsləndiriblər.
© Bütün hüquqlar qorunur. Xəbərlərdən istifadə edərkən www.radiation.gov.az saytına istinad zəruridir.
